الطبخ للجميع

يا ريت تسمحولي يا جماعة أقدملكم موضوع مهم جدآآآآآآآآآآآآ

و هو الطبخ و شعارنا هايكون
الطبخ للجميع

أنا شخصيآ باحب اعتمد على نفسي في صنع العديد من المأكولات الخفيفة الحلوة و المالحة
بحيث اني أعملها في أي وقت بدون ما اتعب أمي معايا أو أتذل لاخواتي البنات

أتمنى المشاركة بالمأكولات المفضلة لديكم مع توضيح طرق تحضيرها


...................... و لكم جزيل الشكر

اسمحولي ابدأ بنوع حلو أنا باحبه جدآ

و هو العصيدة........................

المكونات:

1- كبشة دقيق .
2-3/4 كوب لبن .
3-ملعقة سمنة أو زبدة .
4-4 ملاعق عسل كبار ( أبيض أو أسود ) .





طريقة التحضير :

1- ضع السمن أو الزبد حتى يقدح على النار .
2-ضع الدقيق في الاناء لتحميره .
3-اخلط اللبن بالعسل .
4- اسكب اللبن بالعسل تدريجيآ على الدقيق المتحمر تدريجيآ .
5-استمر في التقليب حتى تحصل على عجينة جافة نوعآ ما .
6-قل بسم الله الرحمن الرحيم .
7-ابدأ في الأكل بس بشويش لاحسن تتصدم .

و بالهناء و الشفاء

الطبخ للجميع وماله يا عم الشيف بس انت متأكد لو كلت من اللي انت بتقوله ده مش حيجيلي تسمم

على فكرة انت طرحت موضوع رااائع بس لو سمحت الطريقة اللى انت كتبتها بتاعت اى اكلة يعنى اسمها ايه الاكلة دى

بسم الله الرحمن الرحيم

السلام عليكم ورحمة الله وبركاته

لمحبي البيتزا...
اعجبتني طريقتها حبيت انقلها لكم



المقادير :


2 كوب و نصف دقيق
3 ملاعق صغيرة خميرة
ثلاث أرباع كوب ماء
ملعقة صغيرة سكر
2 بياض بيضة بدرجة حرارة الغرفة
ملعقة صغيرة خل
3 ملاعق طعام زيت زيتون
ملعقة صغيرة ملح
ملاحظه
أضفت مع الدقيق قليل من الاوريجانو و الريحان المجفف و الثوم البودرة للطعم .
الطريقة :
في وعاء واسع نخلط الدقيق مع الملح و نضعه جانبا
نخلط الخميرة مع السكر في كوب الماء و نتركه لمدة من 6-10 دقائق حتى يتفاعل.
نخلط بقية المقادير مع الدقيق ونعجن جيدا لمدة 3 دقائق
سوف تلصق العجين قليلا من الممكن إضافة قليل من الدقيق
نغطي العجين بكيس بلاستيكي ونضعها في مكان دافئ لمدة 40 دقيق
بعد أن تخمر العجين نضعها على سطح مرشوش عجين جيدا حتى لا تلصق
نقوم بفردها باليد أو النشابة
نشكلها بشكل دائرى
نفرد العجين اكبر من الصينية قليلا حتى تطوى الأطراف بشكل تجميلي
نضع العجين على ورق الزبد أو أي ورق خاص بالفرن ثم نضعه في الصينية
بعد وضع العجين في الصينية نقوم بالضغط باليد(نضع قليل من الدقيق باليد عند الضغط حتى لا تلصق العجين) بخفة وترتيب الأطراف
نصب ملعقة أو اثنين زيت زيتون ونفرشها على العجين بخفة
ونتركها على الأقل 5 دقائق قبل وضع المكونات عليها
نضع عليها صلصة الطماطم المعده بالبيت او الجاهزة
ثم نضع عليها المكونات المفضلة لدينا ( فلفل بكل الالوان – بصل – مشروم – طماطم مقطعة حلقات – زيتون – جبنة شيدر – جبنة موزاريلا) أي شئ يخطر على بالك .
ندخلها في منتصف الفرن على درجة حرارةعاليه إلى أن تحمر من اسفل وتنضج ثم نخرجها ونتركها تبرد قليلا قبل التقطيع والتقديم
واللي يحبون البيتزا اللي حوافها تحتوي على الجبنه
ماعليهم سوا ان يقومون بنفس الطريقه واتباع مايلي
نفرد العجين بحيث تكون اكبر من الصينية قليلا والأطراف للخارج ثم
نحضر الجبن المقطع شرائح بالطول ونضعه في الصينية بالترتيب.
ثم نطوي الأطراف للداخل ونغمس ايدينا بالدقيق حتى لا تلصتق مع الضغط بخفة حتى تغلق جيدا..
وهذي النتيجه

كل واحد يكتب طريقة عمل اى اكلة واعملوا البيتزا وادعولى

الله انتوا جوعتونى اوى على فكرة وشكل البيتزا يهبل اصلا انا كنت هاكل الشاشة من شكلها

بس انا بعرف اطبخ الاكلات الصعبة اللى عايزالها تحضير زى الملوخية باعملها حلوة اوى وباعرف اعمل البامية وماكرونة بالبشاميل والرقاق والمحشى واى حاجة انتوا تحبوها يعنى ست بيت شاطرة والله

لو عايزة تعرفى طريقة طبخ الملوخية او البامية او اى نوع من المحاشى ارجوكى ما تتردديش بانك تتصلى بيا على الخط الساخن 00 ما فيش اطلبنى ماتلاقينيش هتلاقينى انا الشيفة رنا بترد عليكى على طول ما تنسوش الرقم 00مافيش اطلبنى ماتلاقينيش

والله يا امجد موضوع جامد جدا وتشكر عليه بس الردود دى جميله وخصوصا رد (((رنا))) لانها قالت بالظبط اللى انا كنت هعمله الصورة دى جامده جدا انا كنت هكسر الشاشه وامد ايدي اخدها من جوه

البيتزا دى جميلة جدااااااا وشكلها يجوع
وعلى فكرة يا امجد فكرة الموضوع جميلة جدااااا ونتمنى المزيد

على فكرة يارنا كل ما اتصل00 الاقى الخط مشغول

ميغسي بالكوب



الحقيقة يا جماعة أحرجتوني بذوقكم


كويس أول مرة أحس اني متجاوب مع طلبة تربية نوعية


ادعولي كدة أبقى برضه متجاوب مع الفهرسة هي و صفيّة

و جزاكم الله خيرآ

يا جماعة ...الأكلة اللي أنا قدمتهالكم اسمها عصيدة أو حصيدة
بس اوعوا حد يفتح جوجل الصور و يكتب عصيدة لاحسن هتظهر صور
غير العصيدة اللي أنا باقوللكم عليها بالمقادير دي

أهم حاجة المقادير يا جماعة ... احنا طلبة شاطرين و ما يندحكش علينا

و الست الشاطرة تغزل برجل إيـــــــــــــــــــــــــــــــــــــــــــــــــه ؟؟؟












































أكيد طبعآ كلكم نويتوا تدخلوا على جوجل الصور و تكتبوا عصيدة
ههههه . هو الشعب المصـــــــ ــــــري كدة

نقول له اعمل ما يعملش
طاب ماتعملش ... لازم يعمل

أشكر الأخت شروق على البيتزا اللي قدمتهالنا

الحقيقة لو هانقارنها بالبيتزا اللي بيعملوهالنا عندنا في البيت

ممكن نقول على اللي بيعملوها عندنا دي سميط عليه ورق أحمر جاف (طماطم)
و بقع سوداء مبهمة (زيتون )


و الأخت رنا يا ريت تقدملنا طرق الحاجات الصعبة اللي بتعرف تعملها

علشان نتعلم منها

أنا على فكرة أصعب حاجة أتعلمها ... الحاجة اللي بتتقدملي في وعاء تقليدي

( بمناسبة الفهرسة ) انما الحاجات اللي باتعلمها بسرعة اللي بتبقى

في وعاء استانلس أو تيفال علشان ما تلزقش

بص يا اخ امجد اولا طريقة عمل الملوخية سهلة جدا
اول حاجة لازم تجيب الحاجة اللى انت هتعمل منها الشوربة زى ارنب -بطة -فرخة (كل واحد وامكانياته بقى ياجماعة )
وبعدين تجيب مية وتملى مثلا نص الحلة وتحط الفرخة او الحاجة وتحط شوية ملح وبصلة عشان الحلة ما تسودش وحط فلفل كمان ماشى
وبعدين تحطها على النار لمدة ساعة وكل ربع ساعة تروح مقلبها على جنب من اجنابها عشان تستوى من كل الاجناب
وبعدين تروح تخرط الملوخية كويس وما تسيبهاش عشان ما تسودش ويبقى طعمها وحش
بس لغاية مالفرخة تستوى تطفى النار عليها وتشيلها اهم حاجة من الحلة وتحط بقى الملوخية بس
وبعدين بقى تعمل التقلية ودى تحط حتة سمنة صغيرة وتحط عليها حتة توم صغيرة بعد كدة تحط شوية كوسبرة وتقلب كله ببعضه وتحمرهم شوية على النار و(تشهق زى محمد صبحى ودى اهم حاجة وتحط التقلية فى الملوخية) وبكدة تكون طبخة مصرية مية فى المية )

شكرا يا اخ امجد على الموضوع

وانا الان هعمل اكله من اصعب الاكلات خدوا بالكم ........تقريبا اصعب من البيتزا..........








الاكله هى كيف تحضر البيض المتقش..........
1) تسيح حته سمنه زبده فى طبق
2)تطقش البيض فى الطبق وتقعد جمب الطبق تقلب بس حاسب للبيض يلذق فى الطبق زى ما حصل معايا اول مره.
3)تجيب حته جبنه وتوضعها على البيض وتقلب بردك.
4)تاكل البيض وتبقى تدعيلى واللى يحصله تلبخ معويى ميجبش اسمى فى التحقيق.


وشكرا لكم الشيف احمد.................

حلو الموضوع ياامجد بس بالنسبه لرنا انا فعلاكل مطلب الاقي الخط مشغول.........ماشيه معاكي فله..بس الاحسن بقي عمايل السلطه
لاني مبعرفش اكل الالما يبقي في سلطه ............والبيتزا حلوووووووووووووه وشكلها يجنن ...........تصد
قي جعت ....سلام عشان انا قايمه اكل

اه يا جماعه احنا دخلنا فى الاقتصاد المنزلى ولا ايه........
بس جاااااااااااااااااااااامد يا امجد الله يكرمك وتقدم لينا اكلات كمان وكمان.......
بيييييييييييييييييس يا برنس الاكلات.....

تحياتي لكل من شارك في مطبخنا المتميز

اأشكر الأخت رنا على الملوخية الجميلة
و على فكرة أنا أمي مشهورة في عيلتنا بالملوخية
أخواتي كانوا ساعات و الله يشبطوا في ملوخية الصبح و هم رايحين المدرسة
و برضه كانت بتعملهم و يأكلوها قبل ما يمشوا
و الملوخية أكلة مصرية اللي ياكلها ما يقدرش يسيب مصر


و باشكر أحمد فتحي اللي قدملنا طبق البيض الرائع دة

أنا و أبويا بس اللي بناكل البيض المفقوش بجميع أنواعه و أصنافه
و اخواتي البنات لو شافوه في حالة غير المسلوق
ممكن يقوموا من على الاكل خالص


جزاكم الله كل خير
و نريد من سيادتكم المزيد



(النهاردة كنا عاملين سبانخ)

لا بجد جميله جدا العصيده دى يا اخ امجد وانا جربتها والحمد لله جالى تسمم وبكلمكم من المستشفى دلوقت

المقادير المطلوبة:
- مكرونة مسلوقة
- صلصة الباشميل
- لحمة مفرومة معصجة
- جبنة موزاريلا مبشورة
والآن لعمل اللحمة المعصجة نستخدم:
- بصلة مفرومة
- لحمة مفرومة
- حبة طماطم مفرومة
- صلصة طماطم
- فصين ثوم مدقوقين (هناك من لا يفضل استخدام الثوم)
- ممكن خضار مشكلة وأنا هنا استخدمت ذرة مفرزنة (هناك من لا يفضل استخدام الخضار أو الذرة)
- ملح وفلفل أسود وبهار
طريقة عمل اللحمة:
نسخن الزيت عالنار ثم نضيف البصل المفروم ونقلب قليلا إلى أن يذبل لونه

نضع اللحمة فوقه ونقلب جيدا
تترك إلى أن يتغير لونها إلى اللون البني ثم نضيف الثوم ونقلب
(تذكرة هناك من يفضل ألا يستخدم الثوم)

تضاف قطع الطماطم وتقلب جيدا



تضاف الذرة (أو الخضار) ونقلبها وتترك إلى أن تذبل الطماطم
(تذكرة هناك من يفضل ألا يستخدم الخضار أو الذرة)

ثم نضيف الصلصة




تترك على النار إلى أن تتسبك وتصبح جاهزة


لعمل البشاميل نحتاج إلى:
- كوب طحين تقريبا 7 ملاعق كبيرة
- لتر من الحليب أي تقريبا أربع أكواب
- زبدة
- ملح وفلفل أسود وبهارات

نضيف الطحين مع الحليب عالبارد


يضع على النار و نحركهم بالمضرب السلك إلى أن يذوب الطحين تماما و يختفي

بعد أن يسخن بقليل نضيف الماجي والملح والفلفل الأسود والبهارات وطبعا لا نتركها أبدا بل نستمر بالتحريك حتى لا تتكتل



نضيف الزبدة

نستمر بالتحريك إلى أن يثخن قوام البشاميل هكذا



ترفع من على النار

و الآن التطبيق (وضعها في الطبق)

اللحمة جاهزة والبشاميل جاهز والمكرونة خلاص اتسلقت

نضع المكرونة المسلوقة في طبق عميق أو قدر ونضيف فوقها نصف كمية البشاميل



نقلب المكرونة مع البشاميل جيدا حتى يمتزجوا وممكن إضافة القليل من الجبنة الموزاريلا معها



نحضر صينية الفرن وندهنها بقليل من الزبدة ونغطي قاع الصينية و الحواف بالبقصمات



نضيف طبقة من المكرونة



ثم نفرد فوقها اللحمة



ثم طبقة المكرونة الثانية
و نغطيها تماما



ثم باقي صلصة البشاميل هكذا



نوزع الجبنة الموزاريلا المبشورة فوقها



ندخلها فرن ساخن لمدة نصف ساعة أو أكثر إلى أن تتحمر الأطراف



نفتح الشواية و نحمر الوجه




نتركها تبرد شوية قبل التقطيع حتى لا تهترئ أثناء التقطيع
شكلها حلو ممممممممممم

تقطع
يللا هاناكل مممممممممممممممم


و تقدم مع السلطة
عارف مفيش وقت للسلطة دلوقتي






بالهنا والشفا

جزاك الله خيرآ كثيرآ يا أستاذ محمد على الأكلة الجميلة دي

و اللي بنعتبرها عندنا في البيت أكلة اساسية

كنت و أنا صغير و الله أطلبها منهم في أي وقت
حتى لو بالليل .... كانت أختي تعملهالي


و أشكر أختي ندى على المجازفة اللي عملتها و انها جربت تاكل حصيدة

بس بجد طلعت وحشة و لا ايه ؟

على فكرة الأكلات اللي بيبقى فيها لخبطة شوية زي العصيدة
لازم الواحد يعملها بدقة و أكيد مش هاتظبط من أول مرة


بس على آخر مرة ممكن نقول يا رحمن يا رحيم






أشكركم على المشاركة في مطبخنا و أنتظر المزيد من الأكلات الشهية

ايه دة يا جماعة



معقولة ... الموضوع عجبكم أوي للدرجة دي


..............................................................................................


يا جماعة أتمنى تزويد مطبخنا بالمزيد من الأكلات

مش علشان أنا اللي عامل الموضوع لأ

علشان أي بيت فيه مطبخ

و أتمنى ان الموضوع دة يكون ركن الطبيخ بتاعنا


و فعلآ و بجد نستفيد كلنا منكم و أنا أولكم و الله



شكرآ على القراءة ...................... و لكم جزيل الشكر

واللى عايز يحلى يعمل ايه

نخش بقى على الحلويات

طريقة (الكيكة العادية)


المقادير:
2 كوب دقيق
1 كوب سكر
5 بيضات
ملعقة كبيرة بودر
نصف كوب سمن أو زيت ( حسب الرغبة )
نصف ملعقة صغيرة فانيليا
ماء أو لبن أو عصير برتقال (مستحسن) للعجن
بشر برتقالة
الطريقة:
يخلط السكر والسمن والبيض ثم يضاف الدقيق والبودر والعصير والبشر ويرب جيدا في اتجاة دائري
حتي يمتزج الخليط جيدا مع مراعاة عدم خفق الخليط كثيرا حتي لا يخرج منه الهواء
يصب الخليط في صينية مدهونة بالسمن ومرشوشة بالدقيق
ثم توض مباشرة في فرن ساخن
وتخبز عند درجة حرارة متوسطة 180 درجة تقريبا
وتترك حوالي 40 دقيقة
بعد ذلك تخرجيها من الفرن مباشرة وتقلب علي منخل سلك وتترك حتي نبرد

الشعرية


بصراحة أنا مدمن أي نوع من أنواع الأطعمة المسكرة .. اللي غرقانة شربات

كدة يعني



الشعرية :
1 - ضع حوالي 3 كوب ماء في إناء ليغلي .

2 - ضع 2 ملعقة من الزبد أو بديل متوفر عندك مع قليل من زيت في إناء آخر علي النار .

3 - لما تقدح .. أفرغ كيس الشعرية و حمّره في الزبد .

4 - قلّب حتى تتحمص الشعرية جيدآ و تظهر بالون الأحمر .

5 - صب الماء المغلي على الشعرية لغاية فوق سطح .... و قول تش .

6 - قلب الشعرية .. هاتلاقيها قد تماسكت أثناء صب الماء .

7- ضع قليل من افانيليا و المكسرات إذا أردت .

8 - زوّد ماء حتى تغطي سطح الشعرية و تعلوها بواحد سنتيمتر .

9 -هدئ النار و يستحسن أن يوضع الإناء على بتاعة صفيح

من اللي بيتحط عليها الأرز علشان ما يلسعش .

10 -اتركها 10 - 15 دقيقة .. و يستحسن الاشراف عليها كل خمس دقائق .

11- جربها بأخذ عينة و انفخ فيها لتبرد م جربها حتى تجدها قد استوت.

12 - اطفئ النار أولآ ثم ضع سكر حسب الرغبة من 5 - 8 ملاعق كبيرة سكر .

* لو حطيت السكر على الشعرية و هي على النار .. هايلزق و يتحرق .

13 - قلب السكر جيدآ .. ثم جربه حتى تصل للمذاق الحلو حسب رغبتك .

* أعتذر إذا كان هناك أي شيئ مش مظبوط ... لأني باسعى لشرح

عمل الشعرية بالمقادير المعتادة ... و اللي أنا مش باعملها لنفسي بالمقادير دي

فمن الممكن أن أكون قد اتلخبطت ... و اسمحولي أقول اتلخبطت كدة عادي في وسط الكلام

* أنا باحب الحاجات سكرية جدآ ممكن أحط عليها لنفسي أكتر من عشرين ملعقة سكر .
بس دة غلط يا جماعة .. السكر الكتير غلط .. ماشي .

أنا باحط على الشاي 3 ملاعق سكر لو أمي في المطبخ علشان بتزعقلي لو حطيت كتير

و لو لوحدي ممكن خمسة ستة .









و بالهناء و الشفاء



لما تعملوها و تاكلوها و تتعبوا بالسلامة

ابقوا ادعولي بقى ساعتها

علشان دعوة المريض إن شاء الله مستجابة

الصراحه مش بحب الطبخ خاااااااااااااالص ولا المطبخ حتي

ليه ياجماعة

المطبخ دة قدر كل واحدة هاهاهاهاهاها (ضحكة شريرة متقطعة )


هاتدخلووووووووووووووه هاتدخلووووووووووووووه


لازم تتعلموا الطبيخ دة شيئ ممتع جدآ و بيعلم الاعتماد على النفس و الله

و الصبر