ارجو المساعده انا فى مشكله

المشكله ان فى هكر بيهاجم المعلومات ال على الجهاز بتاعنا وانا مش عارفه اعمل ايه وده من مده وبجد خايفه لان دى شبكة تجسس عالميه وفى حاجات خاصة على الجهاز
ارجو المساعده
ياريت تقولولى اعمل ايه او انزل برنامج ضد ده ازاى

بسم الله الرحمن الرحيم


حضرتك اول حاجة تهمنا دلوقتي اننا نعمل سكان شامل للجهاز يشمل الكوكيز و النسخة نفسها
و دة الكاسبر ما بيطلعش فيروساته


اول حاجة اعملي سكان من عالنت
و دة أنا جبت لحضرتك الرابط المباشر بتاعه لتوفير العناء على سيادتكم
و هو

http://www.eset.com/online-scanner/run

هتظهر نافذة كالآتي



علّمي على كل الحاجات اللي فيها و بعدين اضغطي start

هيعد الأول عدة بسرعة بعدين هيبدأ من تاني ال scane نفسه بقى

بس لازم النت يفضل متصل خلال فترة ال scane و سيبيه و قومي اتعشي عادي

و أما يخلص اتأكدي انه مسح الفيروسات كلها هاتلاقي كلمة threats مرة بالأحمر
و مرة بالأخضر اتأكدي ان عدد ال threats دي متكرر بالأخضر زي بالأحمر

بكدة يبقى الجهاز اتعمله سكان شامل شامل الكوكيز اللي هتعلّمي عليها زي ما قلت مسبقآ
و يعتبر نظف النسخة تمامآ




__________________________________________________________-


بعد كدة بقى نزلي كاسبر سكاي 2010
و دة جبت لحضرتك الرابط المباسر بتاع تحميله اهوه لتوفير العناء برضه

و هو الآتي


http://downloads.kasperskyusa.com/files/main/en/kav2010_9.0.0.736en.exe


و دة بيعمل اوتوماتيك سكان على أي حاجة ممكن تسبب خطر للجهاز

أي حاجة بتفتحجيهل على الجهاز أو عالنت أو حتى أما بتحطي
اي فلاشة في الجهاز بيبدأ سكان اوتوماتيك



الحقيقة أنا فعلآ تعبت على ماكتبت الرد دة و جبت الروابط دي بس كله بتعبه



عاوز خمشتاشر جنيه


طبعآ عملتي كدة دلوقتي



أتمنى أكون قدمت شيئآ مفيدآ لسيادتكم

و لو احتاجتوا أي حاجة أنا تحت امركم

و ابقي طمنينا بقى




و السلام عليكم و رحمة الله - سبحانه و تعالى - و بركاته

على فكرة انا عملت اصلآ رد تاني قبل دة و كان مليان روابط و شرح خطوة بخطوة و موضح بالصور

و بجد تعبت على ما عملته ...................
و في الآخر اتهبلت كدة و انا مش واخد بالي و قمت قافل النافذة كلها بكل التابس اللي فيها و كل شيئ راح

قلت الحمد لله و بدأت من جديد



أنا بس باعرفكم يعني ان الخمشتاشر جنيه مش كتير و لا حاجة

بجد والله انا لسه دخله دلوقتى لاننا كنا فاصلين الجهاز تما ما وكنا مرعوبين
والف شكر ليك يا امجد على الاهتمام ده وبجد مش عارفه اقولك ايه بجد مليون شكرا وشكرا على المعلومات دى وحعملها كلها ان شاء رب العزه تبارك وتعالى وان شاء الله الجهاز يتصلح وطبعا حيكون ليك دور كبير فى ده بعد ربنا

وان شاء الله هجيب حصله واحوشلك الخمشتاشر جنيه وادهملك بس انا شايفه انهم شويه على المجهود ال انت عملته بجد والله

اكيد مستغرب بس انا دخله باسم اختى لانى وقعه فى مشكله تانيه ان الموقع كان اتمسح مع الويندوز الجديد وجبته من وحده صحبتى ولما جيت ادخل لقتنى نسيه الباس ورد فدخلت ببتاع اختى عشان ارد عليك واشكرك
ومش عارفه اعمل ايه فى الباس ورد ده كمان وربنا يسهل وافتكره بس مش باين
وجزاك الله كل خير
والسلام عليكم ورحمة الله وبركاته

ربنا يجازيكوا كل خير

و اللي عملته دة تفضل مني طبعــــــــــــــــــــــــــآ

قصصدي .. واجب عليّ



بس أنا بصراحة اتوغوشت في الأول ... لقيت اختي أمة الله بتقول:

كنا فاصلين الجهاز

قلت إيه كنا دي

بس على العموم أهم حاجة الأون لاين سكان دة

إن شاء الله هيحل المشكلة

و خلاص ممكن نخليهم تماناشر جنيه بقى و خلاص

_______________________________________________

جزاكم الله خيرآ

و السلام عليكم و حمة الله و بركاته

السلام عليكم ورحمة الله وبركاته
وجزاك الله كل خير
ومش شايف ات تمانشر كتير شويه خليهم خماشتشر وربع كده كويس على قد الميزانيه
وكمان انا لسه هحوشهم
وانا اسماء وقلت كنا لان الجهاز مش بتاعى لوحدى
والسلام عليكم ولرحمة الله وبركاته
وجزاك الله كل خير

بجد يا امجد ربنا يباركلنا فيك على مجهوداتك دى وربنا يجازيك خير ان شاء الله على كل اللى بتعمله ده ويارب مشكلتك تتحل باذن الله يا اسماء اما بالنسبه للباس ورد ده سهل ان شاء الله ادخلك بباسورد جديد اللى انتى عاوزاه ان شاء الله

جزاك الله كل خير يا محمد بس ياريت موضوع الباس ورد ده ميطولش انا بدخل ببتاع اختى امة الله ولو هتعمله ياريت يكون لا اله الا الله وجزاك الله كل خير انت وامجد

السلام عليكم ورحمة الله وبركاته
شكرا جزيلا لكم كلكم وخاصة أمجد طبعا تعبانة معانا ربنا يبارك فيك.
بس احنا كده هنعمل جمعية علشان خاطر التماناشر جنية ممكن تقسطهم لو سمحت إحنا غلابة .

معلش طبعا للخبطة إلي عملتها أسماء بس انا هحرمها من المصروف لمدة
أسبوع .
شكرا مرة تانية وربنا يبارك لكم

الحقيقة يا جماعة انتوا بتحرجوني جدآ

مش عارف اقول إيه و الله
بس جايز تكون المواقف اللي زي دي الصمت ممكن يكون خيرآ من ألف كلمة ممكن أقولها ليكم


ربنا يكرمكم جميعآ يا رب و يوفقكم

و مش عارف ليه النهاردة كل ما اكلم حد اقوله إني نفسي اشوفه عريس


ربنا يباركلنا فيكم جميعآ

و نفرح سوا بإذن الله بكل واحد فينا



بس أنا الأول إن شاء الله


( أمجد دة قرّار جدآ ... أما بيفتح في الكلام ما بيبقاش عايز يخلص )


صحيح ........ كلمة السر اللي قولتيها لمحمد

حاولي تكتبيها له في رسالة خاصة و تكون برضه ( لا اله الا الله )

بس علشان تبقى باسوورد قويـــــــــــــة دخلي فيها رقم و حروف كابتال و سمول

ممكن تبقى بالانجليزي بس انتي بتكتبي أزرار عربي عادي

__________________________________________

ممكن فضول مني يعني اعرف أختنا أمة الله أكبر مننا و لا اصغر مننا

علشان بس أعرف أتكلم مع أستاذتنا الكبيرة أو اختنا الصغنونة


_________________________________

طولت أنا اوي


جزاكم الله كل خير

" و السلام على من اتبع الهدى "

و السلام عليكم و رحمة الل - سبحانه و تعالى - و بركاته

و السلام عليكم و رحمة الله - سبحانه و تعالى - و بركاته

وعليكم السلام ورحمة الله وبركاته
أنا الحمد لله خلصت كلية علوم السنة إلي فاتت يعني أختكم الصغنونة .
عقبالكم كده وتجيبوا أعلي التقديرات إن شاء الله .
ربنا يبارك فيكم جميعا .

اللهم آمين

ممكن اتمادى في الفضول و اعرف حضرتك كنتي قسم إيه

بس كده هتدفع أكتر (اخصم بقي من التماناشر جنيه)
بس ولا يهمك قسم ميكروبيولوجي

الحقيقة يعني مش عارف اقوللكم إيه ؟


جامعة طنطا ؟

جامعة طنطا

على كدة بقى تعرفي روزميري اللي في قسم كيمياء

و لا ما تاخديش بالك منها ؟

روزميري who is ؟
دا اسم بنت ولا ................... نبات

هههههههههههههه

لألألأ ....دة اسم حيوان جليدي بيحب يعيش في الصحراء






تعرفي حد في قسم كيمياء كان دفعتك و لاا..............

السلام عليكم ورحمة الله وبركاته
اللهم صلي عليك يا سيدي يا رسول الله
أعرف بعض البنات بس مش كتير

تعرفي إيمان ؟
روزميري ؟
مصطفى ؟ ( الولد الوحيد اللي كان معاهم )

و على فكرة هم كلهم بياخدوا تربوي السنة دي




شكرآ جزيلآ على رد سيادتكم عليّ

و أعتذر إن كنت اخذت راحتي زيادة عن اللزوم في الكلام و اللماضة مع سيادتكم


و السلام عليكم و رحمة الله و بركاته

بجد أسماء محددة ومشهورة إيه الافادة الجامدة دي أكيد في مليووووووووووووون إيمان .

ولا يهمك -في اللماضة -بس إنت أكيد زي أخوي الصغير .

وانا اكيد زى اختك الصغيره برده ولا ايه
وانا بشكرك يا امجد على المساعده دى وجزاك الله كل خير وانا بشكرك باسمى المره دى

انا نفسى اسال سؤا متاخر شوية صحيح بس اهو بسال

اية علاقة لما يكون حد بيتجسس على الجهاز الخاص ببرنامج انى فيروس وتعمل سكان على الجهاز

وبعدين امة اللهانتى عرفتى منين ان فى حد بيتجسس عليكى

ولو فعلا متاكدة ان دة فعلا صح الانتى فيرس ملهوش اى دخل بالموضوع

الانتى سباى هوة المتحكم تقدرى تشغلية من eset 4.8 انما السكان مش بيعمل اى حاجة وبعدين انتى تقدرى تكلمى الشركة الى انتى منها تقدر تغيرلك الاي بى بتاعك نهائى وتتحل المشكلة خالص وتقدر تخفيهولك كمان


بس بجد نفسى اعرف انتى منين عرفتى ان فى حد بيتجسس عليكى

f4r&Ev@r كتب:

انا نفسى اسال سؤا متاخر شوية صحيح بس اهو بسال

اية علاقة لما يكون حد بيتجسس على الجهاز الخاص ببرنامج انى فيروس وتعمل سكان على الجهاز

وبعدين امة اللهانتى عرفتى منين ان فى حد بيتجسس عليكى

ولو فعلا متاكدة ان دة فعلا صح الانتى فيرس ملهوش اى دخل بالموضوع

الانتى سباى هوة المتحكم تقدرى تشغلية من eset 4.8 انما السكان مش بيعمل اى حاجة وبعدين انتى تقدرى تكلمى الشركة الى انتى منها تقدر تغيرلك الاي بى بتاعك نهائى وتتحل المشكلة خالص وتقدر تخفيهولك كمان


بس بجد نفسى اعرف انتى منين عرفتى ان فى حد بيتجسس عليكى

السلام عليكم ورحمة الله وبركاته
أنا كان جاء لي رسالة من برنامج اسمه antimalware doctor ان في فيروس hacar وان في حد بيحاول يتجسس ويحصل علي المعلومات الخاصة بالجهاز . بس نزلنا ويندوز جديد وبيقولوا ان كده المشكلة اتحلت والله أعلم .
وربنا يستر.